სემეკ-ის სამუშაო ჯფუფმა 24 ივლისის ავარიის მიზეზების შესწავლის პირველადი შედეგები წარადგინა.როგორც სემეკ-იდან საქართველოს პირველი არხის ჟურნალისტი იუწყება, 2026 წლის 24 ივლისს საქართველოს ენერგოსისტემა პარალელურ რეჟიმში მუშაობდა აზერბაიჯანის ენერგოსისტემასთან 330 კილოვოლტი ძაბვის ელექტროგადამცემი ხაზების მეშვეობით. დაახლოებით 00 საათსა, 10 წუთზე და 49 წამზე მოხდა საქართველოს ენერგოსისტემის გამოყოფა აზერბაიჯანის ენერგოსისტემიდან და საქართველოს ენერგოსისტემა დარჩა იზოლირებულ რეჟიმში, რა დროსაც დაიწყო სიხშირისა და ძაბვის ვარდნა. აღნიშნულმა მაჩვენებლებმა მიაღწიეს იმ მნიშვნელობებს, რომელი მნიშვნელობების შედეგადაც ენერგოსისტემაში დაიწყო კასკადური გამორთვები როგორც ელექტროსადგურების, ისე მომხმარებლის. შედეგად კი მოხდა ენერგოსისტემის სრული ჩაქრობა.„აღნიშნული ფაქტის განმაპირობებელი ერთ-ერთი გარემოება, დღეის მდგომარეობით და სსეს-ის მიერ მოწოდებული ინფორმაციის თანახმად, გახდა ქვესადგურ „ქუთაისი 220“-დან გამომავალი 110 კილოვოლტი ძაბვის ელექტროგადამცემი ხაზი „გეგუთი“, რომელიც წარმოადგენს სააქციო საზოგადოება „ენერგო-პრო ჯორჯიას“ საკუთრებას.საქართველოს სახელმწიფო ენერგოსისტემა არ უნდა დალოდებოდა ელექტროგადამცემ ხაზებზე სრულფასოვნად სწრაფმოქმედი დაცვების მოწყობას და უნდა განეხორციელებინა არსებული რელეური დაცვის და ავტომატიკის გადაანგარიშება, რათა მინიმუმამდე დაეყვანა თუნდაც აზერბაიჯანთან გამყოფი ავტომატიკის ამოქმედების ალბათობა და ემოქმედა საქართველოს ენერგოსისტემის საიმედოობის და მდგრადობის უზრუნველყოფის ინტერესების შესრულებისთვის. მოცემული საკითხი საჭიროებს ორი მიმართულებით კვლევას. პირველი – გახლავთ კავშირის გაწყვეტა აზერბაიჯანთან და მეორე საკითხი – საქართველოს ენერგოსისტემის იზოლირებულ რეჟიმში მუშაობის უნარიანობის ნაწილში“, – აცხადებენ სემეკ-ის სამუშაო ჯგუფში.შეგახსენებთ, 24 ივლისს ქვეყნის მასშტაბით ელექტროენერგია გაითიშა. ელექტროენერგიის მიწოდება რამდენიმე საათით იყო გათიშული 25 ივლისსაც. სემეკ-მა ამ ეტაპზე 24 ივლისს ელექტროენერგიის გათიშვის მიზეზების პირველადი შედეგები გამოაქვეყნა.სუს-მა 24 და 25 ივლისს ქვეყნის მასშტაბით ელექტროენერგიის მიწოდების ავარიულად გათიშვის გამო გამოძიება საბოტაჟის მუხლით დაიწყო. 1tv.ge 

სემეკის თავმჯდომარის, დავით ნარმანიას შეფასებით, წელს საკმაოდ უხვნალექიანი გაზაფხული და ზაფხულის პერიოდი იყო, რის შედეგადაც ჰიდროგენერაციის ობიექტებზე გამომუშავებამ მაქსიმალურ ნიშნულს მიაღწია.როგორც დავით ნარმანია გადაცემა "ბიზნესპარტნიორში" განმარტავს, აღნიშნულ პერიოდში ქვეყანა სრულად საკუთარი ენერგეტიკული რესურსებით იყო უზრუნველყოფილი."მიმდინარე წლის პირველ ნახევარზე უკვე შეგვიძლია ვისაუბროთ, რადგან 6 თვე გავიდა და გარკვეული მაჩვენებლები გვაქვს. ამასთან, ენერგეტიკის სექტორში რამდენიმე მნიშვნელოვანი ტენდენცია გამოიკვეთა. ეკონომიკური ზრდისა და ცხოვრების დონის გაუმჯობესების ფონზე, ქვეყანაში ელექტროენერგიის მოხმარება გაიზარდა. ამასთან, ელექტრომობილების დამტენი მომწყობილების მოხმარება სულ უფრო იზრდება, აღნიშნული ელექტროენერგიაზე მოთხოვნას იწვევს. მნიშვნელოვანი მიმართულებაა ასევე ციფრული ტექნოლოგიები, ბლოკჩეინი, თანამედროვე IT და სერვერული ინფრასტრუქტურა. ამ სექტორების განვითარებას ხელს უწყობს ისიც, რომ საქართველოში ელექტროენერგიის ფასი შედარებით იაფია, ვიდრე მაგალითად ევროპაში, ან ჩვენი რეგიონის სხვა ქვეყნებში", - აცხადებს დავით ნარმანია.სფეროს წარმომადგენელი ასევე ელექტროენერგიის ტარიფზეც საუბრობს და განმარტავს, რომ შემდგომი რამდენიმე წლის განმავლობაში ტარიფების მატება მოსალოდნელი არ არის."არ ველოდებით, რომ 3 წლიან პერიოდში ელექტროენერგიის ფასები გაიზრდება. მომდევნო პერიოდში კრიტიკულ მდგომარეობაში არსებული ინფრასტრუქტურა უნდა გამოიცვალოს, ეს იქნება: გადამცემი ხაზები, ქვესადგურები, თუ სატრანსფორმატორო პუნქტები. მომდევნო 5 წლის განმავლობაში ძალიან მნიშვნელოვანი გადაიარაღება გვექნება", - აცხადებს დავით ნარმანია.bp.ge 

„ჯორჯიან უოთერ ენდ ფაუერის“ (GWP)  ინფორმაციით, ქვეყნის მასშტაბით ელექტროენერგიის მიწოდების შეწყვეტის გამო ავტომატურად შეჩერდა კომპანიის სატუმბო სადგურების ფუნქციონირება, რის გამოც თბილისისა და რუსთავის მოსახლეობის ნაწილს, შესაძლოა, შეეზღუდოს ან დაბალი წნევით მიეწოდოს წყალი.„გაცნობებთ, რომ ქვეყნის მასშტაბით ელექტროენერგიის მიწოდების შეწყვეტის გამო ავტომატურად შეჩერდა „ჯორჯიან უოთერ ენდ ფაუერის“ სატუმბო სადგურების ფუნქციონირება, რის გამოც თბილისისა და რუსთავის მოსახლეობის ნაწილს, შესაძლოა, შეეზღუდოს ან დაბალი წნევით მიეწოდოს წყალი.წყალმომარაგება სრულად აღდგება GWP-ის  სატუმბო სადგურებზე ელექტროენერგიის მიწოდების აღდგენისთანავე.კომპანიის ტექნიკური ჯგუფები საგანგებო რეჟიმში მუშაობენ, წყალმომარაგება სრულად აღდგება „ჯივიპის“ სატუმბო სადგურებზე ელექტროენერგიის მიწოდებისთანავე“, – აღნიშნულია GWP-ის  განცხადებაში.შეგახსენებთ, დღეს, დაახლოებით 00:10 საათზე, ქვეყნის მასშტაბით ელექტროენერგიის მიწოდება ავარიულად გაითიშა.

 სემეკის მიერ დაფუძნებული ენერგეტიკის სასწავლო ცენტრის აპარატის უფროსი, თემურ თორდინავა ენერგეტიკისა და კლიმატის ცვლილებების შესახებ საუბრობს, მისი ინფორმაციით, თანამედროვე ეპოქაში ენერგეტიკის სექტორი ნებისმიერი სახელმწიფოს ეკონომიკური სტაბილურობის, სოციალური კეთილდღეობისა და ეროვნული უსაფრთხოების ქვაკუთხედს წარმოადგენს. თუმცა, გლობალური კლიმატის ცვლილება და მისგან გამოწვეული სტიქიური მოვლენები: უხვი ნალექი, დიდთოვლობა, მეწყრული პროცესები, წყალდიდობები და შტორმები სულ უფრო დიდ საფრთხეს უქმნის კრიტიკულ ინფრასტრუქტურას. როგორც თემურ თორდინავა აცხადებს, ენერგოსისტემის მცირე შეფერხებასაც კი შეუძლია ჯაჭვური რეაქციის გამოწვევა. მისი შეფასებით, საქართველომ ბოლო წლებში მნიშვნელოვანი ნაბიჯები გადადგა ენერგეტიკული სექტორის რეფორმირების თვალსაზრისით, თუმცა ენერგოინფრასტრუქტურა კვლავ გამოწვევების წინაშეა კლიმატური კატასტროფების მიმართ. სწორედ ამ გამოწვევაზე მზადყოფნის გასაძლიერებლად, სემეკის მიერ დაფუძნებულმა ელიზბარ ერისთავის სახელობის ენერგეტიკის სასწავლო ცენტრმა ვიშეგრადის საერთაშორისო ფონდის მხარდაჭერით წამოიწყო ახალი ინიციატივა: „ენერგეტიკული ინფრასტრუქტურის უსაფრთხოება კლიმატის ცვლილებით გამოწვეული კატასტროფების დროს“. პროექტის მთავარი ინოვაციური ელემენტი ენერგეტიკული ინფრასტრუქტურის უსაფრთხოებისა და კლიმატის ცვლილებით გამოწვეული კატასტროფებისადმი მზადყოფნის კომპლექსური, მრავალშრიანი ინტეგრირებაა."ინიციატივა ქმნის უნიკალურ მოდელს, სადაც ქართველი ექსპერტების ცოდნა, ვიშეგრადის ჯგუფის ქვეყნების მდიდარი კანონმდებლობა და პრაქტიკული გამოცდილება ერთიანდება. ერთობლივი ძალისხმევით დაგეგმილი აქტივობები უზრუნველყოფს დასახული მიზნებისა და ისეთი პრაქტიკული შედეგების მიღწევას, რომლებიც მნიშვნელოვნად გააძლიერებს საქართველოს ენერგოსექტორის მდგრადობას. ინიციატივისთვის გურიის რეგიონის საპილოტე არეალად შერჩევა განაპირობა, მისმა კლიმატურმა მოწყვლადობამ და მნიშვნელოვანმა ენერგეტიკულმა პოტენციალმა,"-აცხადებს თემურ თორდინავა. მისივე განცხადებით, რეგიონში არსებული რთული მეტეოროლოგიური პირობები უხვი ნალექი და დიდთოვლობა სერიოზულ საფრთხეს უქმნის ენერგოინფრასტრუქტურის სტაბილურობას, რაც თვალსაჩინოდ დაადასტურა 2025 წლის თებერვლის დიდთოვლობამ. სწორედ გურიის მაგალითზე შეიქმნება ენერგოინფრასტრუქტურის უსაფრთხოების პრაქტიკული გზამკვლევი და ეს მოდელი შემდგომში საქართველოს სხვა მოწყვლად რეგიონებშიც გავრცელდება.,,ენერგოინფრასტრუქტურის უსაფრთხოება საჭიროებს ახალ მოდელს კლიმატის ცვლილებებთან მზადყოფნის გასაძლიერებლად“ ინიციატივის სულისკვეთებაც ესაა: ვიშეგრადის ქვეყნების (უნგრეთი, ჩეხეთი, პოლონეთი, სლოვაკეთი) გამოცდილების გაზიარება საქართველოსთვის ენერგეტიკული ინფრასტრუქტურის მდგრადობისა და კლიმატთან დაკავშირებული კატასტროფების მიმართ მზადყოფნის საკითხებზე. პროექტის ფარგლებში დაგეგმილია კვლევის მომზადება, საუკეთესო საერთაშორისო პრაქტიკისა და რეგულაციების შესწავლა, პრაქტიკული გზამკვლევის/მოდელის და საერთაშორისო ექსპერტების მიერ შესაბამისი რეკომენდაციების შემუშავება,"-აცხადებს თორდინავა.  

დღეიდან, სემეკისა და იუსტიციის სახლის ერთობლივი პროექტის ფარგლებში მელიორაციის სექტორის სამი ახალი სერვისი იუსტიციის სახლის ყველა ფილიალშია ხელმისაწვდომი.ახალი მომსახურებები მომხმარებლებს შესაძლებლობას აძლევს, განაცხადი გააკეთონ ახალი წყალმომარაგების განრიგის შეთანხმების, არსებული განრიგის შეცვლისა და გაუქმების მოთხოვნით. მომსახურებით სარგებლობა შეუძლიათ როგორც ფიზიკურ, ასევე იურიდიულ პირებს.„საქართველოს მელიორაციის“ მომსახურებით სარგებლობა შეუძლიათ როგორც მიწის ნაკვეთის მესაკუთრეებს, ისე დროებით მფლობელებს. სერვისის მისაღებად აუცილებელია დაინტერესებული პირი რეგისტრირებული იყოს შპს „საქართველოს მელიორაციაში“ მომხმარებლად და ჰქონდეს მინიჭებული უნიკალური ნომერი. ახალი სერვისების მიწოდების პროცესს თბილისის ცენტრალურ იუსტიციის სახლშიადგილზე გაეცნენ სემეკის თავმჯდომარე დავით ნარმანია, იუსტიციის სახლის თავმჯდომარე ვახტანგ ჟვანია, შპს „საქართველოს მელიორაციის“ გენერალური დირექტორი გიგლა თამაზაშვილი, სემეკის წევრი გიორგი ფრუიძე და სემეკის რეგულირების განვითარებისა და მეთოდოლოგიური უზრუნველყოფის დეპარტამენტის დირექტორი ვანო მეჭურჭლიშვილი.ახალი მომსახურების დანერგვით იუსტიციის სახლში მელიორაციის სერვისების ინტეგრაციის პროცესი დასრულდა. იუსტიციის სახლი სახელმწიფო და კერძო სექტორის 500-ზე მეტ სერვისს ერთ სივრცეში აერთიანებს და მომსახურების არეალს მუდმივად აფართოებს.

მომსახურების კომერციული ხარისხის ელექტრონული მონიტორინგის სისტემის ამოქმედების შემდეგ, კომუნალური კომპანიების მიერ მომხმარებლებისთვის გადახდილმა კომპენსაციამ 28.75 მილიონ ლარს გადააჭარბა. ამის შესახებ სემეკის მომსახურების კომერციული ხარისხის კონტროლის დეპარტამენტის დირექტორმა ანა ზარიძემ გადაცემა "ბიზნესპარტნიორში" განაცხადა.მისივე ინფორმაციით, ეს არ ნიშნავს, რომ მომსახურების ხარისხი დაბალია, რადგან გარანტირებული სტანდარტების 97% ვადაში სრულდება."მომსახურების ხარისხის კონტროლი მნიშვნელოვანია როგორც მომხმარებლებისთვის, ისე სემეკისთვის. მისი ეფექტიანი მონიტორინგისთვის სემეკმა შეიმუშავა ელექტრონული პლატფორმა, რომელიც რეალურ დროში აკონტროლებს მომხმარებლებზე გაწეული მომსახურების ხარისხს. როგორც კი მომხმარებელი დაწერს განაცხადს ინფორმაცია ავტომატურად ისახება ელექტრონულ ჟურნალში და მარეგულირებელს აქვს მყისიერი წვდომა მასზე. გარდა მომხმარებელთა მიმართვებისა, პროგრამაში იტვირთება წყვეტების შესახებ ინფორმაცია როგორც გეგმურ, ისე ავარიულ შეზღუდვებზე. ადრე თუ მომსახურების ხარისხის შეფასებას ვაკეთებდით საერთო სტატისტიკურ ინფორმაციაზე დაყრდნობით, დღეს უკვე თითოეულ მომსახურებას და წყვეტას რეალურ დროში ვაკონტროლებთ. ამან შესაძლებლობა მოგვცა, რომ მონიტორინგი უფრო ეფექტური და ზუსტი გახდეს. 2 ტიპის სტანდარტია დადგენილებით - ეს არის საერთო და გარანტირებული. საერთო სტანდარტი უყურებს კომპანიის მიერ გაწეული მომსახურების ხარისხს მთლიანობაში, ხოლო გარანტირებული სტანდარტები უკვე  ინდივიდუალურ მომხმარებლებზეა გათვლილი და აკვირდება ინდივიდუალური მომხმარებლისთვის გაწეულ კონკრეტულ მომსახურებას. რაც შეეხება სტანდარტების დარღვევას - აქაც, მნიშვნელოვანია რა სტანდარტი ირღვევა. პირობითად, თუ ვადაში არ შესრულდა გარანტირებული სტანდარტი კომპანიას აქვს ვალდებულება  მომხმარებელს გადაუხადოს წესებით განსაზღვრული კომპენსაცია. ამის ასახვა ხდება ავტომატურად და მომხმარებელს აღარ უწევს ქოლცენტრში დარეკვა. გასული წლის მაჩვენებლებზე დაყრდნობით დაახლოებით, 3 მლნ ლარზე მეტი კომპენსაციის გადახდა მოხდა, თუმცა ელექტრონული პლატფორმის ამოქმედების შემდეგ ეს რიცხვი საკმაოდ მსუყეა და ცდება 28 750 000 ლარს.მიუხედავად იმისა, რომ ძალიან დიდი მოცულობის კომპენსაციის გადახდა მოხდა - არ ნიშნავს, რომ  საქართველოში მომსახურების ხარისხი არის დაბალი. გარანტირებული სტანდარტების 97%-ს კომპანიები ვადაში ასრულებენ და სწორედ იმ 3%-ს ეკუთვნის ეს გადახდილი კომპენსაცია. გადახდილი კომპენსაციების 51% წყალმომარაგებაზე, 39% ელექტროენერგეტიკის და 10% ბუნებრივი გაზის. აქვე ხაზი მინდა გავუსვა იმას, რომ კომპენსაციების უმეტესი ნაწილი არის ქსელი მომსახურებების დარღვევების გამო და წყლის სექტორში იმდენად რთული სამუშაოების შესრულებაა საჭირო, რომ სამწუხაროდ, გარკვეულ შემთხვევებში ვერ ხერხდება ვადების დაცვა", - აცხადებს ანა ზარიძე.ცნობისთვის, სემეკი უკვე მე-8-ე წელია მომსახურების კომერციული ხარისხის ელექტრონული მონიტორინგის სისტემას იყენებს.

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) მიმდინარე წელს  ელექტროენერგიის, ბუნებრივი გაზისა და სასმელი წყლის მომხმარებლებს კომუნალური კომპანიების მიერ უსაფუძვლოდ დარიცხული 213 049 ლარი ჩამოაწერა,  მათ შორის, ელექტროენერგეტიკის სექტორში - 83 456 ლარი, ბუნებრივი გაზის სექტორში -  29 310 ლარი, ხოლო  წყალმომარაგების სექტორში - 100 281 ლარი. მომხმარებლებს თანხები ჩამოეწერათ სემეკის დავებისა და სერვისების მართვის დეპარტამენტში შესული წერილობითი მიმართვების შესწავლის შედეგად, რომლებიც შეეხებოდა უსაფუძვლოდ დარიცხულ თანხებსა და ხანდაზმულ დავალიანებებს.სემეკი შეახსენებს ელექტროენერგიის, ბუნებრივი გაზის, წყალმომარაგებისა და საირიგაციო წყლის მომხმარებლებს, თუ ადგილი აქვს მათი უფლებების დარღვევას, მიმართონ სემეკის დავებისა და სერვისების მართვის დეპარტამენტს.კონსულტაციების მიღება შესაძლებელია როგორც  სემეკის ქოლცენტრში ნომერზე 16 216, ასევე სემეკის Facebook გვერდზე. სემეკისთვის განცხადებებით მიმართვა შესაძლებელია ელექტრონული ფორმით, ასევე, იუსტიციის სახლის მეშვეობით.

საქართველოს ტექნიკური უნივერსიტეტის ვიცე-რექტორის, თამარ წერეთლის ინფორმაციით, ენერგეტიკა ქვეყნის ეკონომიკის განვითარების ერთ-ერთი მნიშვნელოვანი მიმართულებაა.როგორც თამარ წერეთელი გადაცემა "ბიზნესპარტნიორში" განმარტავს, საქართველოს ტექნიკური უნივერსიტეტი სტუდენტებს სთავაზობს, როგორც ტრადიციული ენერგეტიკის მიმართულებით სასწავლო კურსებს, ასევე ენერგოეფექტურობისა და განახლებადი ენერგიის პროგრამებს. მისივე ცნობით, სტუდენტების მხრიდან ენერგეტიკის მიმართულებით მაღალი ინტერესი ფიქსირდება."საქართველოს ტექნიკური უნივერსიტეტის საინჟინრო სკოლის განვითარება მუდმივად ეფუძნება პრაქტიკაზე ორიენტირებულ სწავლებას. ჩვენი მიზანია ისეთი სპეციალისტები მოვამზადოთ, რომლებიც კონკურენტუნარიანები იქნებიან არა მხოლოდ საქართველოში, არამედ საერთაშორისო შრომის ბაზარზე. შესაბამისად, ძირითადი სტრატეგია, მათ შორის ენერგეტიკის ფაკულტეტის მიმართულებით ისეთი სასწავლო პროგრამების შეთავაზებაა, რომლებიც საერთაშორისო სტანდარტებს შეესაბამება და რაც ყველაზე მნიშვნელოვანია, პრაქტიკულ სწავლებაზეა დაფუძნებული. ასევე, დღეს მწვანე ენერგეტიკა განსაკუთრებულ მნიშვნელობას იძენს. საქართველოს ტექნიკური უნივერსიტეტის სასწავლო ლაბორატორიები აღჭურვილია თანამედროვე ტექნოლოგიებით, რათა სტუდენტებმა მიიღონ არა მხოლოდ თეორიული ცოდნა, არამედ პრაქტიკული გამოცდილებაც", - აცხადებს ტექნიკური უნივერსიტეტის ვიცე-რექტორი.ამასთან, თამარ წერეთელი სასწავლო დაწესებულებაში მიმდინარე პროცესებზეც საუბრობს და აღნიშნავს, რომ ამ ეტაპზე საინჟინრო მიმართულებით სასწავლო პროგრამების განახლებისა და აკრედიტაციის პროცესი მიმდინარეობს."განახლებული პროგრამების ფარგლებში სავალდებულო სტაჟირების კომპონენტის დამატება იგეგმება. სტუდენტები სტაჟირებას პარტნიორ კომპანიებში გაივლიან, რაც შესაძლებლობას მისცემთ, თეორიული ცოდნა პრაქტიკაში გამოიყენონ. ვფიქრობთ, ეს მნიშვნელოვანი სარგებლის მომტანი იქნება როგორც სტუდენტებისთვის, ასევე დამსაქმებლებისთვის.რაც შეეხება მიღებას, სტუდენტების მხრიდან ენერგეტიკის მიმართულებით მაღალი ინტერესი გვაქვს. ტექნიკურ უნივერსიტეტში ერთ-ერთი მნიშვნელოვანი სიახლეა, რომ "ელექტრული და ელექტრონული ინჟინერიის" პროგრამა საერთაშორისო აკრედიტაციის პროცესს გადის. დეკემბერში ამერიკელი ექსპერტების ვიზიტს ველოდებით - იმედია, პროგრამა ABET-ის აკრედიტაციას მიიღებს. რაც იმას ნიშნავს, რომ საქართველოს ტექნიკურ უნივერსიტეტს ექვსი პროგრამა ექნება, რომელიც ამერიკული საინჟინრო აკრედიტაციის სტანდარტებითაა აღიარებული", - ამბობს თამარ წერეთელი.აღნიშნულ საკითხზე გადაცემა "ბიზნესპარტნიორში"  საქართველოს ტექნიკური უნივერსიტეტის ენერგეტიკის ფაკულტეტის დეკანმა, ქეთევან ქუთათელაძემაც ისაუბრა.  მისი თქმით, ტექნიკურ უნივერსიტეტში ლაბორატორიების განვითარებისა და განახლებისთვის ბიზნესთან თანამშრომლობა კიდევ უფრო უნდა გაღრმავდეს."განსაკუთრებით მნიშვნელოვანია საინჟინრო და სამეცნიერო მიმართულებების განვითარება. ჩვენ შევისწავლეთ მსოფლიოს წამყვანი უნივერსიტეტების გამოცდილება, მათ შორის ლაბორატორიების განვითარებისა და განახლების მიმართულებით. ანალიზმა აჩვენა, რომ პროცესში ინდუსტრია აქტიურადაა ჩართული და დაფინანსების მნიშვნელოვანი ნაწილი დაახლოებით 20–25% სწორედ ბიზნესისა და სახელმწიფოს მხარდაჭერაზე მოდის. მსგავსი თანამშრომლობის გარეშე თანამედროვე ლაბორატორიების განვითარება და უახლესი სასწავლო პროგრამების დანერგვა რთულია. სწორედ ამიტომ გვინდა, ბიზნესთან თანამშრომლობა კიდევ უფრო გაღრმავდეს", - აცხადებს ქეთევან ქუთათელაძე.bp.ge 

სემეკის თავმჯდომარემ, დავით ნარმანიამ მონაწილეობა მიიღო საქართველოს ეკონომიკური ფორუმის 31-ე პანელურ დისკუსიაში - „წყლის რესურსები და სატარიფო პოლიტიკა, ურბანული განვითარება, ეკონომიკური ზრდა და მდგრადი განვითარების მიზნები”. ღონისძიება საქართველოს მთავრობის ადმინისტრაციის უფროსმა ლევან ჟორჟოლიანმა გახსნა.დავით ნარმანიამ ყურადღება გაამახვილა წყალმომარაგების სექტორების განვითარებისთვის სატარიფო რეგულირების მნიშვნელობაზე.“წყალმომარაგება კაპიტალტევადი დარგია, სექტორში მეტი ინვესტიცია ნიშნავს შემცირებულ ავარიულ გათიშვებსა და მოწესრიგებულ წყალმომარაგების ინფრასტრუქტურას.  Fitch-ისა და S&P Global-ის ანგარიშებში აღინიშნა, რომ წყალმომარაგების სექტორის განვითარებისთვის მნიშვნელოვანია სატარიფო გარემო იყოს ყოველთვის პროგნოზირებადი და ხარჯების ამსახველი რეალურ დროში. ყოველდღიური მონიტორინგის საფუძველზე, მარეგულირებელი კომისია სისტემატურად მუშაობს რეგულირების დახვეწასა და გაუმჯობესებაზე. ჩვენი მიზანია, რომ  წყალმომარაგების სექტორი გახდეს უფრო მეტად ეფექტიანი”, - აღნიშნა დავით ნარმანიამ.სემეკის თავმჯდომარესთან ერთად, ეკონომიკურ ფორუმში მონაწილეობდნენ საქართველოს გაერთიანებული წყალმომარაგების კომპანიის დირექტორი ბესიკ ჯიქურაული, Aqualia-ს რეგიონული დირექტორი ხოსე ენრიკე ბოფილი, თბილისის ვიცე-მერი გიორგი ტყემალაძე, თბილისის საკრებულოს თავმჯდომარე ზურაბ აბაშიძე, რუსთავის მერი ნინო ლაცაბიძე, “ჯივიპის” გენერალური დირექტორი ხოსე მიგელ სანტოსi.ღონისძიებას მოდერატორობას უწევდა „ბიზნეს ინსაიდერი საქართველოს“ და "საქართველოს ეკონომიკური ფორუმის" დამფუძნებელი და ხელმძღვანელი გიორგი აბაშიშვილი.დისკუსიის ფარგლებში მონაწილეებმა იმსჯელეს წყლის რესურსების ეფექტიანი მართვასა და ურბანული განვითარების თანამედროვე გამოწვევებსა და შესაძლებლობებზე, ეკონომიკური ზრდის მდგრადი მოდელის ჩამოყალიბებაზე, ინფრასტრუქტურული პროექტების როლზე ქვეყნის კონკურენტუნარიანობის გაძლიერებაში, გარემოსდაცვითი და სოციალური პასუხისმგებლობის ინტეგრაციაზე ეკონომიკურ პოლიტიკაში, სატარიფო პოლიტიკაზე, ასევე მდგრადი განვითარების მიზნების განხორციელების მიმართულებით საქართველოს პროგრესსა და სამომავლო პრიორიტეტებზე.ფორუმს ესწრებოდნენ საკანონმდებლო და აღმასრულებელი ხელისუფლების წარმომადგენლები, ბიზნეს სექტორი, ცალკეული კომპანიების ხელმძღვანელები, მფლობელები და პარტნიორები, აკადემიური და ანალიტიკური სექტორის წარმომადგენლები.

"დღეს ენერგეტიკულ პროექტებში საინვესტიციო ხარჯები მნიშვნელოვნად არის გაზრდილი. მაგალითად, თუ ადრე ჰესების შემთხვევაში ინვესტიციის ანაზღაურების მაჩვენებელი დაახლოებით 5%-ის ფარგლებში იყო, ახლა პროექტების ღირებულება საშუალოდ 25%-ით არის გაზრდილი" -  ამის შესახებ "ბიზნესპარტნიორის" ღამის ეთერში  მზის ენერგიის ასოციაციის თანადამფუძნებლმა თორნიკე დარჯანიამ განაცხადა.მისი თქმით, ერთ-ერთი მთავარი მიზეზი გლობალური ინფლაციაა."მნიშვნელოვნად გაძვირდა ფერადი ლითონები: სპილენძი, ალუმინი და სხვა მასალები, რომლებიც ენერგეტიკული ინფრასტრუქტურისთვის აუცილებელია. მხოლოდ სპილენძის ფასი ბოლო პერიოდში 20-30%-ით გაიზარდა და ზრდის ტენდენცია კვლავ ნარჩუნდება.გარდა ამისა, შეიცვალა საერთაშორისო სავაჭრო პოლიტიკაც. მაგალითად, ჩინეთმა მზის პანელების ექსპორტზე დამატებითი შეზღუდვები და გადასახადები დააწესა. ამას ემატება რეგიონში არსებული გეოპოლიტიკური ვითარება, მათ შორის ირანის მიმართულებით შექმნილი რისკები, რის გამოც ტრანსპორტირების ხარჯებიც დაახლოებით 20%-ით გაიზარდა. გაძვირებულია საწვავიც და, ფაქტობრივად, ყველა ძირითადი კომპონენტი, ბუნებრივია, ინვესტორი ამ ყველაფერს ითვალისწინებს", - ამბობს დარჯანია.მისივე თქმით, თუ სახელმწიფოს სურს, რომ ასეთი პროექტები განხორციელდეს, უნდა შექმნას შესაბამისი პირობები, რადგან ეს პროექტები ნიშნავს სამუშაო ადგილებს, ეკონომიკურ აქტივობას და ქვეყნის განვითარებას.BP.GE